Patuloy nating itinayo ang pundasyon ng mas maayos at maunlad na pamayanan sa pamamagitan ng mga makabuluhang proyekto sa imprastraktura. Hindi lamang ito mga konkretong istruktura kundi mga simbolo ng ating pagsusumikap na gawing mas maginhawa at progresibo ang buhay ng bawat Angatenyo.
Matagumpay nating naisakatuparan ang pagsasaayos ng mga sira-sirang kalsada sa mga pangunahing lansangan upang mapabuti ang daloy ng trapiko at masigurong ligtas ang biyahe ng ating mga kababayan. Bukod dito, itinayo ang mga bagong tulay upang mapadali ang transportasyon sa mga liblib na lugar, habang ang mga bagong kanal at drainage system ay itinayo upang maiwasan ang pagbaha at masigurong epektibo ang waste management sa ating bayan.
Isa rin sa pinakamalaking hakbang natin ngayong taon ay ang pagtatayo ng bagong munisipyo, na magsisilbing sentro ng mabilis, epektibo, at de-kalidad na serbisyo para sa lahat. Dagdag pa rito, naglaan tayo ng pondo para sa pagtatayo ng mga bagong silid-aralan upang mapabuti ang kalidad ng edukasyon at matiyak na ang ating mga kabataan ay may maayos na lugar para sa pagkatuto. Hindi rin natin nakalimutan ang sektor ng kalusugan—binuksan ang mga bagong super health center upang mas mapalapit at gawing mas abot-kaya ang serbisyong medikal para sa ating mamamayan.
Ang lahat ng ito ay naisakatuparan sa pamamagitan ng maayos na pakikipag-ugnayan sa mga ahensya ng pambansang pamahalaan at pagsisikap ng lokal na pamahalaan na tiyakin ang tamang paggamit ng pondo para sa tunay na pangangailangan ng mga Angatenyo. Ngunit hindi tayo titigil dito—patuloy nating isusulong ang mas marami pang proyekto na magpapalakas sa pundasyon ng ating bayan. Sama-sama nating ipagpatuloy ang pagbuo ng isang Angat na higit pang aangat!
.png)
Comments